Kreu i partisë “Shqipëria Bëhet”, Adriatik Lapaj ka reaguar në lidhje me aktin e sotëm të Qeverisë, e cila ka rrethuar me Polici godinën e News 24 në Shkozë, duke i fikur sinjalin televizionit dhe duke mos lejuar gazetarët të futen në redaksi, për shkak se do e kthejë në fabrikë të prodhimit të armëve.
Në një postim në rrjetet sociale, Lapaj solidarizohet me gazetarët, teksa shton se kjo është qasje e dhunshme ndaj një televizioni që ka qenë dritare edhe për mendimin ndryshe.
Sipas tij, e vërteta është që Shqipëria drejtohet nën diktatin e një njeriu, ndryshon vetëm subjekti radhës ku aplikohet fadroma dhe “ligji”.
Postimi i plotë:
Solidarizohem plotësisht me gazetarët dhe median News 24, Ballkanweb, Panorama dhe Gazeta Shqiptare që sot janë ndaluar së ushtruari misionin e tyre informues për qytetarët.
Mund ta shtjellojnë si të duan e sa të duan, në sytë e mi kjo është qasje e dhunshme ndaj një televizioni që ka qenë dritare edhe për mendimin ndryshe.
Në një vend të kapur si ky, do të gjendet gjithmonë një zyrtar, një gjykatës apo një drejtues policie që i kopsit letrat si duhen për të “zbatuar ligjin” nga Maliqi.
E vërteta është që Shqipëria drejtohet nën diktatin e një njeriu, ndryshon vetëm subjekti radhës ku aplikohet fadroma dhe “ligji”.
