Presidenti amerikan Donald Trump ka paralajmëruar se të gjitha sportistet femra që do të marrin pjesë në Lojërat Olimpike “Los Angeles 2028” mund t’i nënshtrohen një testimi të detyrueshëm për përcaktimin e seksit përpara se të lejohen të konkurrojnë.
Ky njoftim vjen në vazhdën e polemikave që shoqëruan Olimpiadën e fundit në Paris, ku boksieret Imane Khelif nga Algjeria dhe Lin Yu-ting nga Tajvani fituan medalje të arta, pavarësisht se më parë ishin përjashtuar nga Kampionati Botëror i Grave 2023 për dështim në testet e përshtatshmërisë gjinore, sipas Shoqatës Ndërkombëtare të Boksit (IBA).
IBA kishte deklaruar se boksieret nuk kishin kaluar një test specifik për përcaktimin e seksit, ndonëse pa zbuluar detaje, duke pretenduar se ato kishin përparësi të padrejta ndaj kundërshtareve të tyre.
Pavarësisht këtyre shqetësimeve, Komiteti Olimpik Ndërkombëtar (IOC) kishte lejuar pjesëmarrjen e tyre në Lojërat e Parisit, duke argumentuar se gjinia dhe mosha e atletëve përcaktohen nga pasaportat e tyre, sipas praktikave të mëparshme.
Trump: “Do të ketë testim të fortë gjinor para Olimpiadës”
Në një konferencë për shtyp, Presidenti Trump u pyet për situatën lidhur me atletët transgjinorë dhe sigurinë në sport, veçanërisht në disiplinat si boksi.
“Po, mendoj se do të ketë një formë shumë të fortë testimi,” tha Trump, duke shtuar se çështja e ngritjes së mundshme të akuzave për sportistë që paraqiten me gjini të ndryshme do t’i kalojë për shqyrtim Prokurorit të Përgjithshëm.
Sipas rregullave të reja që pritet të hyjnë në fuqi më 1 shtator, sportistet femra do t’i nënshtrohen një testimi njëherë në jetë për gjenin SRY, i cili është një tregues biologjik për përcaktimin e seksit.
Trump njoftoi gjithashtu krijimin e një task-force speciale në Shtëpinë e Bardhë, që do të mbikëqyrë organizimin dhe standardet e Lojërave Olimpike të vitit 2028, që do të zhvillohen për herë të tretë në Los Anxhelos – pas edicioneve të vitit 1932 dhe 1984.
Teste edhe për Kampionatin Botëror të Atletikës
Ndërkohë, organizata World Athletics ka konfirmuar se të gjitha sportistet femra që do të garojnë në Kampionatin Botëror të Atletikës në Tokio muajin e ardhshëm, do t’i nënshtrohen gjithashtu një testimi gjenetik njëherë në jetën e tyre. Testi do të kryhet me metoda jo-invazive, përmes një tamponi në faqe ose një testi gjaku.
Në fokus është garantimi i barazisë në konkurrencë, ndërkohë që debati për përfshirjen e atletëve transgjinorë dhe përcaktimin e saktë të gjinisë biologjike në sportet elitare mbetet i nxehtë në arenën ndërkombëtare.
