Disa nga termocentralet e vjetra me qymyr dhe gaz në Europë do të kenë një të ardhme “teknologjike”, pasi gjigantët e sektorit, si Microsoft dhe Amazon, kërkojnë t’i ripërdorin ato si qendra të dhënash.
Kompani të tilla si Engie e Francës, RWE e Gjermanisë, dhe Enel e Italisë, po kërkojnë të përfitojnë nga një rritje e kërkesës për energji, e nxitur nga inteligjenca artificiale, duke i shndërruar stacionet e vjetra të energjisë në qendra të dhënash. Kjo do të siguronte marrëveshje fitimprurëse afatgjata të furnizimit me energji me operatorët e tyre.
Kjo mundësi u ofron shërbimeve publike një mënyrë për të kompensuar kostot e larta të mbylljes së termocentraleve të vjetra, si dhe potencialisht për të siguruar zhvillimet e ardhshme të energjisë së rinovueshme.
Firmat e teknologjisë i shohin këto stacione si një mënyrë të shpejtë për të siguruar lidhjet me rrjetin elektrik dhe me impiantet e ftohjes së ujit, dy pengesa të mëdha në industrinë e inteligjencës artificiale. “Janë të gjitha pjesët së bashku, infrastruktura e ujit dhe rikuperimi i nxehtësisë”, shpjegojnë ekspertët e sektorit.
Kompanitë e shërbimeve mund të marrin me qira tokën ose të ndërtojnë dhe operojnë vetë qendrat, duke siguruar kontrata afatgjata të energjisë me firmat e teknologjisë. Marrëveshjet ofrojnë shumë më tepër sesa thjesht shitjen e tokës së papërdorur, pasi ato përfshijnë mundësi për të ardhura të qëndrueshme dhe me marzh të lartë fitimi.
Pjesa më e madhe e 153 termocentraleve të qymyrit dhe linjitit të BE-së dhe Britanisë së Madhe do të mbyllen deri në vitin 2038 për të përmbushur objektivat klimatikë, duke u bashkuar me 190 termocentralet që kanë ndalur punën nga viti 2005.
