Analisti Lutfi Dervishi ka reaguar me kritika pas nderimit që kryeparlamentarja Elisa Spiropali i bëri Ndre Mjedës, të cilin e cilësoi si “një nga figurat më të ndritura të Rilindjes Kombëtare”.
Përmes një postimi në rrjetet sociale, Dervishi ironizoi Spiropalin, duke theksuar se ndonëse ajo e vlerësoi Mjedën për kontributin e tij kombëtar, duket se ka anashkaluar një aspekt kyç të figurës së tij: “Rolin si deputet dhe si hartues i rregullores së parë të Parlamentit shqiptar“.
“Ndoshta askush nuk ia ka thënë, ose ajo vetë nuk ka pyetur” shkruan Dervishi, duke shtuar se është paradoksale që një kryetare e Kuvendit të nderojë një paraardhës të saj pa pasur njohuri të plota për kontributin e tij real.
Në përfundim, Dervishi sugjeron me ironi që në vend të fjalimeve për identitetin, do të ishte më e dobishme një kurs i shkurtër: “Parlamenti për fillestare”.
Reagimi i plotë i Lutfi Dervishit:
“Spiropali nderon Ndre Mjedën si “një nga figurat më të ndritura të Rilindjes Kombëtare”, por duket se as drita nuk ka mjaftuar për t’i ndriçuar kujtesën. Sepse askush s’i ka treguar, ose ajo s’ka pyetur, që Mjeda jo vetëm ishte deputet, por edhe hartuesi i rregullores së parë të Parlamentit shqiptar.
Pra, zonja kryetare e Kuvendit po nderon një nga paraardhësit e saj direkt, pa pasur fare idenë se çfarë ai përfaqësonte në të vërtetë. E gjitha kjo ngjan me dikë që vendos një bust, por nuk lexon tabelën poshtë tij. Ndaj ndoshta në vend të fjalimeve për identitetin, mund të nisim me një kurs të shkurtër: Parlamenti për fillestare!”, shkruan Dervishi.
