NBA-ja i ka besuar JPMorgan Chase dhe Raine Group rolin këshillimor për krijimin e një kompeticioni të ri autonom të basketbollit në Evropë, me synimin për të përfituar nga rritja e shpejtë e interesit për këtë sport në kontinentin evropian.
Sipas Financial Times, drejtori ekzekutiv i JPMorgan, Jamie Dimon, ka interes personal për projektin ‘NBA Europe’, i cili synon të shfrytëzojë përvojën tregtare dhe markën globale të ligës amerikane për të mbushur boshllëkun që drejtuesit e NBA-së shohin në tregun evropian.
JPMorgan udhëheq planifikimin dhe realizimin financiar të projektit, ndërsa Raine, e njohur edhe për rolin e saj në shitjen e ekipit të futbollit Chelsea, kontribuon në hartimin strategjik. Në garën për të marrë projektin ishte edhe Goldman Sachs, por nuk u përzgjodh në fund.
Basketbolli po njeh rritje dhe popullaritet të madh në Evropë, por shfrytëzimi tregtar i tij është ende i ulët, me një pjesëmarrje më të vogël se 1% në një treg të medias sportive që vlerësohet në 20 miliardë dollarë, sipas drejtuesve të NBA-së.
Kompeticioni i ri, që ndodhet ende në fazë eksploruese, parashikohet të përfshijë nga 14 deri në 16 ekipe, ku disa do të kenë pjesëmarrje të përhershme dhe të tjera do të duhet të kualifikohen përmes garave.
NBA-ja ka nisur bisedime me klube evropiane si Real Madrid, Barcelona dhe Olimpia Milano për përfshirje të mundshme.
Në të njëjtën kohë, po zhvillohen kontakte me klube futbolli si Manchester City dhe pronarët katariotë të Paris Saint-Germain, të cilët kanë shprehur interes për të krijuar ekipe basketbolli në tregje me zhvillim më të ulët.
Po ashtu, janë duke u shqyrtuar bashkëpunime me fonde investimesh private.
Komisioneri i NBA-së, Adam Silver, pati këtë javë një takim me kryeministrin britanik Keir Starmer për këtë kampionat të ri, ndërsa të enjten u takua edhe me përfaqësues të Real Madridit.
Liga e re e NBA-së, e cila do të funksionojë paralelisht me kampionatet kombëtare të vendeve evropiane, pritet të ushtrojë presion të ndjeshëm mbi EuroLeague, kompeticioni më i lartë evropian për klube, i cili ekziston që nga viti 1958.
