Kristal Abazaj është lojtari i ri i Dritës. Sulmuesi ka vendosur të vazhdojë karrierën në Kosovë, aty ku ka firmosur me kampionët në fuqi.
Klubi nga Gjilani ka njoftuar se Abazaj ka firmosur një kontratë dyvjeçare dhe pritet të shtojë cilësinë në skuadrën e drejtuar nga Zekirija Ramadani.
“Një tjetër emër i madh i bashkohet skuadrës sonë. Mirë se vjen Kristal Abazaj! Jemi të lumtur të njoftojmë përforcimin më të ri të klubit tonë Kristal Abazaj, një lojtar me eksperiencë dhe cilësi të lartë që i shtohet repartit ofensiv.
Pas një angazhimi dhe vendosmërie të madhe, drejtori ynë sportiv Valon Zymberi ka arritur të mbyllë me sukses marrëveshjen që sjell Kristalin në radhët tona.
Abazaj ka firmosur një kontratë dyvjeçare. Ai pritet të jetë një armë e fortë për trajnerin Ramadani. Mirë se vjen Kristal”, thuhet në njoftimin e klubit.
Kristal Abazaj ka një karrierë të pasur, pasi ka luajtur me ekipe si Luftëtari, Kukësi dhe Tirana në Shqipëri, por edhe me skuadra të njohura si Anderlecht në Belgjikë, Osijek në Kroaci dhe Istanbulspor e Ankaragucu në Turqi.
