Medon Berisha shpreson që të jetë përsëri protagonist me Leccen në këtë sezon në Serinë A.
Por mbi të gjitha, shpreson që të mos ketë më dëmtime si ato të sezonit të fundit që e lanë vazhdimisht jashtë fushave të lojës.
Mesfushori i talentuar, duke folur për mediat e klubit të Serisë A, ka theksuar se ky mbetet një nga objektivat e tij kryesorë për këtë edicion.
“Përshtypjet e fazës përgatitore janë të mira, kemi punuar shumë në stërvitje. Jemi të gatshëm për sezonin e ri. Miqësoret ishin teste të mira, padyshim do na nevojiten për kampionatin. Kemi siguruar minuta përgatitjesh, ndërsa tani kemi ndeshje tjetër.
Trajneri Di Françesko na ka sjellë padyshim ide të reja mbi modulin që po aplikojmë, ai më kërkon që të sulmoj më shumë thellësinë dhe të hyj më shumë në zonë.
Objektivi i sezonit? Padyshim do të jetë që të luaj më shumë ndeshje, të mos jem dëmtuar dhe të arrij sa më parë me klubin kuotën e mbijetesës në Serinë A”, ishin fjalët e mesfushorit të Kombëtares shqiptare.
