Luis Diaz tashmë është lojtar i Bayern Munich. Përfaqësuesi kolumbian ka firmosur një kontratë katërvjeçare, e vlefshme deri në verën e vitit 2029.
Në deklaratën e klubit, Díaz është shprehur: “Jam shumë i lumtur, ka shumë rëndësi për mua të jem pjesë e Bajernit, është një nga klubet më të mëdha në Botë. Dua ta ndihmoj ekipin tim të ri me stilin tim të lojës dhe personalitetin tim. Qëllimi im është të fitojmë çdo trofe të mundshëm. Si ekip do të punojmë çdo ditë për këtë”.
Sipas BILD, tarifa fikse e transferimit për anësorin e ri të majtë është 67.5 milionë euro, me mundësi që të arrijë deri në 75 milionë euro përmes bonuseve të lidhura me performancën.
Ylli i ri ofensiv pritet të përfitojë rreth 14 milionë euro në vit në Mynih dhe do të mbajë fanellën me numrin 14. Drejtori ekzekutiv i Bajernit, Jan-Kristian Dresen u shpreh:
“Me Luis Diaz kemi arritur të sjellim një nga anësorët më të mirë të Premier Ligës. Ai është një lojtar i vërtetë, i cili vjen nga Liverpul dhe ka fituar trofe me çdo klub ku ka luajtur”.
Dresen shtoi: “Si ekip, arritëm të realizojmë këtë transferim në mënyrë të synuar dhe jemi të lumtur për një lojtar ndërkombëtar të nivelit të lartë që do t’i japë ekipit tonë shtysë të rëndësishme dhe do të pasurojë edhe Bundesligën. Falënderojmë Liverpulin për negociatat korrekte dhe serioze në çdo moment”.
Kolumbiani ka mbërritur në Mynih të martën herët në mëngjes pas një fluturimi 14-orësh. BILD e kapi atë në momentin kur zbriste nga fluturimi nga Tokio drejt Bavarisë. Drejtori sportiv Maks Eberl (51):
“Luis Diaz është një lojtar me përvojë ndërkombëtare, me cilësi të jashtëzakonshme, aftësi të mëdha dhe besueshmëri të lartë. Ai do të ndihmojë ekipin menjëherë. Jemi të lumtur që arritëm ta sjellim te FC Bajern. Transferime të tilla ndodhin kur gjithçka funksionon në harmoni. Tifozët tanë mund të presin me padurim një lojtar të jashtëzakonshëm”.
Sipas BILD, përforcimi i ri mund të dalë për herë të parë në fushë me bashkëlojtarët e tij të rinj të mërkurën në orën 14:30, nën drejtimin e trajnerit kampion Vinsent Kompani. Prezentimi zyrtar i 28-vjeçarit është planifikuar për të enjten në mesditë.
