Ende nuk ka asnjë gjurmë të 57-vjeçarit portugez Antonio Manuel Antunes Gonçalves, i cili është zhdukur që prej pasdites së së dielës, pasi hyri në det për not dhe nuk u kthye më.
Ditën e sotme, një skaf i Policisë Kufitare të Sarandës ka rinisur kërkimet në zonën detare, ndërsa në terren po angazhohen edhe efektivë të Komisariatit të Policisë Sarandë.
Shtetasi portugez ndodhej në Sarandë për turizëm së bashku me miqtë e tij. Sipas dëshmive, ata po qëndronin pranë lagunës, në zonën e njohur si “Buka e Vivarit”, ku kishin ndaluar për drekë. Rreth orës 18:00, Gonçalves është ngritur dhe ka hyrë në det për të notuar, por që prej asaj kohe nuk është parë më.
Kërkimet po zhvillohen si në det ashtu edhe përgjatë bregut, ndërsa grupi hetimor vijon punën për të sqaruar rrethanat e ngjarjes dhe për të hedhur dritë mbi zhdukjen misterioze të 57-vjeçarit.
