Policia e Tiranës ka arrestuar një të ri, i cili është kapur i armatosur dhe lëvizte me taksi për të shmangur kontrollet e uniformave blu.
Në kuadër të operacionit të koduar “Destinacioni” është vënë në pranga shtetasi Paulo Gjini, 23-vjeç, banues në Lezhë, i cili akuzohet për veprën penale “Mbajtja pa leje dhe prodhimi i armëve, armëve shpërthyese dhe i municionit”.
Ndërkohë, është proceduar penalisht në gjendje të lirë edhe kushëriri i tij, i cili e shoqëronte në taksi, shtetasi, Xh. Gjini, 24 vjeç, banues në Lezhë, i cili akuzohet për veprën penale “Moskallëzimi i krimit”.
“Gjatë operacionit, u ndalua në Rrugën e Dibrës, taksia me të cilën lëviznin shtetasi Paulo Gjini, 23 vjeç dhe kushëriri i tij, shtetasi Xh. Gjini, 24 vjeç, të dy banues në Lezhë. Nga kontrollet, në çantën e 23-vjeçarit, u gjet 1 armë zjarri pistoletë me municion.” – thuhet në njoftimin e bluve të kryeqytetit.
Materialet procedurale iu referuan Prokurorisë së Tiranës, për veprime të mëtejshme.
