Një banore e fshatit Kalasë, në Delvinë ka denoncuar një ngjarje të rëndë, duke akuzuar zjarrfikësit për mosveprim dhe dhunë ndaj familjarëve të saj gjatë një zjarri që ra në një sipërfaqe me ullinj.
Sipas saj, babai dhe gjyshi ndodheshin në tokën me ullinj në momentin që zjarri shpërtheu. Ajo thotë se kishte marrë babain në telefon dhe u nis menjëherë nga Saranda për në vendngjarje bashkë me nënën dhe tezen. Por kur mbërritën, sipas dëshmisë, gjetën zjarrfikësit duke mos bërë asgjë.
“U luta që të më shpëtonin babin. Ai dëgjoi ulërimat e mia dhe doli mes flakëve për të ardhur te ne. Në vend që ta ndihmonin, zjarrfikësit e rrahën me grushte,” tregon vajza për JOQ. Ajo thotë se babai është i sëmurë me mushkëri dhe ka qëndruar një muaj në koma më herët, ndërsa tani ka shenja dhune në trup.
Sipas saj, zjarrfikësit e dinin që edhe gjyshi ishte në zonën e zjarrit, por nuk ndërhynë. Ishte nëna dhe një kushëri që arritën ta shpëtonin.
Zjarri ka shkrumbuar rreth 1 000 rrënjë ullinj që ishin në prodhim prej 15 vitesh, 50 koshere bletësh dhe një makinë me vlerë 20 mijë euro.
