Ylber Ramadani e ka nisur më së miri fazën përgatitore me klubin e Lecce, me të cilin synon që të ketë sezonin e tretë si protagonist në Serinë A. Mesfushori shqiptar shënoi që në ndeshjen e parë miqësore të kësaj skuadre në fazën përgatitore që po zhvillon në Itali.
Leçe mundi me shifrat 11-0 Asv Natz dhe Ramadani e nisi ndeshjen si titullar, duke shënuar një nga golat në pjesën e parë të takimit. Por ky nuk është lajmi i vetëm që ka qarkulluar në mediat italiane rreth tij.
Sipas informacioneve përtej Adriatikut, për Ramadanin është kthyer të interesohet përsëri klubi i Al Ain i Emirateve të Bashkuara Arabe. Trajneri Vladimir Iviç e sheh Ramadanin ndër emrat që mund të përmirësojnë skuadrën e tij për fitoren e kompeticioneve kombëtare e ndërkombëtare, ndaj insiston për transferimin e futbollistit.
Megjithatë, si Leçe, ashtu edhe vetë lojtari, raportohet se nuk kanë marrë një ofertë të qartë zyrtare, ndaj marrëveshja në këtë pikë të sezonit duket pak e mundshme.
Trajneri Di Françesko llogarit Ramadanin mes titullarëve të ekipit të tij për edicionin e ri dhe do ta kishte të vështirë të gjente një zëvendësues të përshtatshëm në një periudhë kaq të shkurtër.
