Një hetim për zhdukjen e një 43-vjeçari ka çuar në një zbulim të rëndë në pyllin Paramoor, pranë fshatit Sticker në Cornwall, ku policia britanike ka gjetur disa trupa të pajetë.
Fillimisht, autoritetet identifikuan mbetjet e Daniel Coleman, i raportuar i zhdukur më 1 qershor nga qyteti St Austell. Për vrasjen e tij është arrestuar dhe akuzuar James Desborough, 39 vjeç, banues në Lower Sticker. Ai është paraqitur para gjykatës në Bodmin dhe pritet të dalë më 8 gusht në Gjykatën e Lartë të Truros.
Gjatë hetimeve të thelluara në zonë, autoritetet kanë zbuluar trupa të tjerë në të njëjtin pyll. Komisionerja e policisë dhe krimit për rajonin, Alison Hernandez, konfirmoi zyrtarisht gjetjet.
“Kemi gjetur trupa të pajetë në atë pyll. Aktualisht po përpiqemi të përcaktojmë sa janë, kush janë dhe çfarë mund t’u ketë ndodhur,” deklaroi ajo.
Për shkak të ndërlikimit të hetimeve, në operacion janë përfshirë edhe agjenci të tjera britanike, përfshirë Agjencinë Kombëtare të Krimit. Në vendngjarje është ngritur një strukturë e madhe forensike, ku ekspertët po analizojnë provat.
Policia britanike nuk ka dhënë ende informacion të plotë mbi identitetin e viktimave të tjera apo lidhjen mes tyre. Hetimet po vijojnë në kushte të rrepta sigurie dhe informacione të tjera priten në ditët në vijim.
