Është publikuar video nga momenti i sherrit të dhunshëm të ndodhur orët e para të mëngjesit të sotëm tek Lumi i Shalës.
Lidhur me ngjarjen nuk ka ende një sqarim zyrtar, ndërsa në pamjet e filmuara nga vizitorë të tjerë, duken mbi 10 persona, të cilët konfliktohen me njëri-tjetrin.
Në një moment sherri agravon mes tyre dhe nisin e gjuajnë me sende të forta, që në dukje ngjasojnë si ‘hunj’.
Sherri ka nisur rreth orës 02:00, mes disa të rinjve shqiptarë turistë dhe disa të tjerëve që ushtrojnë aktivitet biznesi në këtë zonë.
Përplasja fizike ka zgjatur për disa minuta, duke shkaktuar panik dhe shqetësim në këtë pikë turistike që vizitohet nga qindra pushues çdo ditë.
U bë me dije se janë përdorur mjete të forta gjatë konfliktit, ndërsa dy të rinj kanë mbetur të plagosur rëndë.
Kjo nuk është hera e parë që në Lumin e Shalës raportohen përplasje dhe akte dhune, ç’ka e bën të domosdoshme një vëmendje më të shtuar për sigurinë në këtë destinacion gjithnjë e më të populluar nga turistë vendas e të huaj.
Në zone nuk ka prani të përhershme të policisë, ndaj ngjarje të tilla nxjerrin në pah nevojën urgjente për patrullim të përhershëm gjatë gjithë sezonit turistik.
Lexo edhe:
Sherr mes turisteve dhe biznesmenëve në zonën e ‘Lumit të Shalës’, plagosen dy persona
