Gjykata e Elbasanit ka pranuar kërkesën e Prokurorisë për caktimin e masës së sigurisë “detyrim paraqitje” ndaj Denis Hasallës dhe Bledar Çullhajt.
Të dy janë vënë nën hetim pas një kontrolli të ushtruar nga Prokuroria dhe Policia në banesat e tyre, në kuadër të hetimeve për çështjen e inceneratorit të elbasanit, ku u gjetën armë zjarri.
Denis Hasalla, vëllai i deputetit Sajmir Hasalla, ushtron detyrën e drejtorit të kabinetit në Bashkinë e Peqinit. Ndërkohë, bashkëshortja e Bledar Çullhajt ka mbajtur gjithashtu një funksion në këtë bashki.
“Ekziston dyshimi i arsyeshëm, i mbështetur në prova, se të dyshuarit kanë konsumuar elementët e veprave penale të përmendura më sipër. Nuk ekzistojnë shkaqe përjashtuese nga përgjegjësia penale, lidhur me moshën apo gjendjen mendore të tyre, dhe nuk janë konstatuar shkaqe për shuarjen e veprës penale. Gjithashtu, ekziston rreziku që personat nën hetim t’i shmangen hetimit.”- thuhet në vendimin e Gjykatës.
