Një vilë luksoze me pishinë dhe 1050 metra katrorë truall është sekuestruar nga autoritetet në Durrës, pasi dyshohet se është ndërtuar me të ardhura të përfituara nga veprimtaria kriminale e dy vëllezërve të akuzuar për vrasje dhe armëmbajtje pa leje.
Pasuria rezulton të ketë qenë në përdorim nga Luan Kërtalli dhe u sekuestrua në prani të familjarëve të tij, për t’iu kaluar Agjencisë për Administrimin e Pasurive të Sekuestruara dhe të Konfiskuara.
Sipas hetimeve, vila dyshohet se është ndërtuar me të ardhura të përfituara nga aktivitetet kriminale të djemve të tij, Enkel dhe Morel Kërtalli, të hetuar për disa vepra të rënda penale, përfshirë falsifikim dokumentesh, armëmbajtje pa leje dhe vrasje në bashkëpunim.
Të dy vëllezërit janë arrestuar në Spanjë në mars të vitit 2022, në kuadër të një procedimi penal të nisur në vitin 2017, për atentatin ndaj biznesmenit Dashamir Gjoka në zonën e “4 Rrugëve” të Shijakut, ku ky i fundit mbeti i plagosur.
Për këtë rast, Gjykata e Durrësit ka caktuar ndaj tyre masën e sigurisë “arrest me burg”, në mungesë. Hetimet vijojnë për të zbardhur plotësisht rrjetin e përfitimeve të krijuara nga aktiviteti kriminal i familjes Kërtalli.
