Policia e Shtetit ka zbuluar një skemë të re mashtruese që po qarkullon përmes SMS-ve dhe aplikacioneve të komunikimit.
Qytetarët po marrin mesazhe me linke të rreme që pretendojnë se kërkohet përditësim apo verifikim i të dhënave bankare.
Pasi klikojnë në këto linke dhe japin të dhënat, autorët marrin akses në llogaritë bankare dhe në disa raste kanë vjedhur shuma të konsiderueshme parash.
- Policia paralajmëron:
Asnjë bankë nuk kërkon të dhëna përmes SMS apo linkesh të dyshimta
Mos ndani numra kartash, PIN-e apo fjalëkalime
Verifikoni gjithmonë burimin
Raportoni çdo rast të dyshuar
- Njoftimi i policisë:
“Drejtoria e Hetimit të Krimit Kibernetik në Policinë e Shtetit informon opinionin publik lidhur me një skemë mashtruese që po qarkullon së fundi, përmes mesazheve SMS dhe aplikacioneve të komunikimit elektronik.
Shtetas ende të paidentifikuar po dërgojnë mesazhe që përmbajnë linke të rreme, me pretendimin se është i nevojshëm përditësimi i të dhënave bankare ose verifikimi i llogarisë së qytetarëve. Pasi qytetarët klikojnë mbi këto linke dhe japin të dhënat e tyre personale apo bankare, autorët e këtyre veprimeve arrijnë të aksesojnë llogaritë bankare dhe në shumë raste, kanë realizuar vjedhjen e shumave të konsiderueshme monetare.
Policia e Shtetit thekson se asnjë institucion bankar apo shtetëror nuk kërkon përmes SMS-ve apo linkeve të dyshimta dërgimin e të dhënave sensitive, si numrat e kartave bankare, kodet PIN apo kredencialet e tjera të sigurisë.
Për këtë arsye, iu bëjmë thirrje të gjithë qytetarëve:
Të mos klikojnë në asnjë link të dërguar nga burime të panjohura;
Të mos japin të dhënat e tyre personale apo bankare në forma të dyshimta online;
Të verifikojnë çdo informacion të tillë drejtpërdrejt me institucionin përkatës (bankë apo agjenci shtetërore)”, njofton policia.
Lexo edhe:
Mos klikoni linkun! Klientët e Raiffeisen Bank “viktimë” e mashtrimit kibernetik
