Sportistët transgjinorë nuk lejohen në garat për femra në Shtetet e Bashkuara të Amerikës. Kjo u konfirmua nga Komiteti Olimpik Amerikan, i cili njoftoi Federatat e Notit, Atletikës dhe federatat e tjera sportive se ato kanë një “detyrim për t’u pajtuar” me urdhrin ekzekutiv të lëshuar së fundi nga presidenti Donald Trump.
Politika e re, e njoftuar të hënën me një ndryshim në faqen e Komitetit Olimpik Amerikan dhe e konfirmuar në një letër drejtuar organeve kombëtare drejtuese të sportit, vjen pas një mase të ngjashme të miratuar nga NCAA në fillim të këtij viti, e cila preku notaren Lia Thomas, atleten e parë transgjinore që fitoi një kampionat të Divizionit I të NCAA.
Ndryshimi i referohet urdhrit ekzekutiv të Trump, “Mbajtja e Burrave Larg Sporteve të Grave”, të nënshkruar në shkurt. Ky urdhër kërcënon të “shfuqizojë fondet” për organizatat që lejojnë atletët transgjinorë të marrin pjesë në sportet e grave. Zyrtarët olimpikë të SHBA-së u kanë thënë organeve drejtuese kombëtare se do të duhet të bëjnë të njëjtën gjë.
“Si një organizatë e autorizuar federalisht, ne kemi një detyrim të përmbushim pritjet federale“, tha Sarah Hirshland, president e olimpizmit amerikan, që shtoi: “Politika jonë e rishikuar thekson rëndësinë e sigurimit të mjediseve të drejta dhe të sigurta të garës për femrat. Të gjitha organet drejtuese kombëtare janë të detyruara të përditësojnë politikat e tyre të zbatueshme në përputhje me dispozitat e reja“./DW
