Një shpërthim me tritol është regjistruar mesnatën e kaluar në Sarandë. Persona ende të paidentifikuar i kanë vendosur eksploziv automjetit në pronësi të shtetasit Klaus Jaçaj 31 vjeç.
Ky i fundit u shpall në kërkim nga Policia vetëm 4 ditë më parë, pasi dyshohet si i përfshirë në përplasjen mes dy grupeve më 17 Korrik në lagjen numër 4 të Sarandës, ku mbetën të plagosur me armë zjarri dy të rinjtë nga Kamza, Gëzim Hajdaraj 33 vjeç dhe Ernest Lama 24 vjeç, të cilët u dërguan tek Trauma për mjekim më të specializuar.
Klaus Jaçaj akuzohet për përkrahje të autorëve të krimit, pasi dyshohet se ka ndihmuar dy vëllezërit Ramadan Zoto, i njohur edhe si Ramadan Canaj, 43 vjeç, si edhe Erjon Canaj, 36 vjeç, të cilët qëlluan 2 të rinjtë pas sherrit për pronën në bregdet.
Shpërthimi me tritol ka ndodhur në lagjen numër 3 të Sarandës, rreth orës 23:50 dhe dyshohet për motive hakmarrje. Shpërthimi ka qenë i fuqishëm, duke alarmuar banorët, teksa automjeti është përfshirë totalisht nga flakët dhe është shkrumbuar i gjithi. Po ashtu, dëmtime ka pësuar edhe banesa e Klaus Jaçajt.
“Më datë 21.07.2025, rreth orës 23:50, në lagjen nr. 3, Sarandë, dyshohet se ka shpërthyer një sasi lënde eksplozive e vendosur në një automjet, ku janë shkaktuar vetëm dëme materiale. Automjeti rezulton në pronësi të shtetasit K. J., 31 vjeç, person i shpallur në kërkim për veprën penale “Përkrahja e autorit të krimit”, në lidhje me ngjarjen e datës 17.07.2025, ku mbetën të plagosur me armë zjarri dy shtetas”, njoftoi Policia.
