Në vitin 2022, Edi Rama ndërmori një aksion ku IKMT ushtroi kontrolle në kullat e Tiranës dhe kapi me shtesa pa leje ndërtuesit Pëllumb Salillari, Armand Lilo apo Julian Morina i njohur ndryshe si “Lul Morina”.
Pavarësisht se e propagandoi me të madhe aksionin e atëhershëm, shtesat pa leje këta ndërtues abuziv i “ligjëruan” dhe duket se nuk u cënuan fare, pasi lejet dhe tenderat nga Qeveria duket se i shtuan edhe më shumë.
Ndërkohë, pasi “fali” emrat e mësipërm, sot Edi Rama ka paralajmëruar se do të krijojë një “listë të zezë” me ndërtuesit që abuzojnë me territorin dhe që shkelin lejet e ndërtimit.
Këtë deklaratë e bëri gjatë një mbledhje me deputetët dhe drejtorët e Bashkisë së Tiranës, ku tha se ndërtuesit e “listës së zezë” nuk do të përfitojnë me leje ndërtimi.
“Kemi diskutuar dhe do të miratohet me ligj krijimi i një liste të zezë të ndërtuesve dhe të investitorëve që abuzojnë me territorin dhe që shkelin lejet e ndërtimit. Kush hyn në listën e zezë do të humbasë të drejtën për të marrë leje ndërtimi dhe do të penalizohet nëse përfshihet në industrinë e ndërtimit për një numër të caktuar vitesh që do të përcaktohet me ligj,” u shpreh Rama.
Kryeministri paralajmëroi raste edhe më të rënda për ndërtuesit që kanë shkaktuar probleme të rënda për qytetarët, duke i penguar të futen në banesat e tyre ose duke i lënë pa dokumentacion të rregullt hipotekor apo bëjnë shitje të dyfishta.
“Do të merren masa për ndërtuesit problematikë, si rasti kur nuk lejojnë banorët të futen në pallat apo kur bëjnë shitje të dyfishta. Masat për këto kategori do të jenë drastike. Iu bëj thirrje që të zgjidhin menjëherë këto çështje, përndryshe do t’i gjejë një bela,” paralajmëroi Rama.
LEXO EDHE:
