Kreu i Nismës Thurje, Endrit Shabani, ka komentuar debatin e hapur me ish-aleatin Adriatik Lapaj, mbi mandatin e vetëm që koalicioni “Shqipëria Bëhet” fitoi në zgjedhjet e 11 majit.
Shabani theksoi se mandati i Qarkut Tiranë iu dha Kleana Xhuvelit, e cila renditet e katërta në listën shumëemërore, ndërsa kandidatët e renditur më lart nuk kanë shfaqur asnjë pretendim për këtë mandat.
Ai e konsideron këtë çështje si një debat mbi standardet: “Mandati i takon Xhuvelit, e cila përfaqëson partinë Shqipëria Bëhet. Edhe pse ajo përfaqëson edhe votat e Nismës Thurje, ne nuk kemi kërkuar ta marrim mandatin,” deklaroi Shabani në News24..
Ai shpjegoi gjithashtu se, nëse votat do të ndaheshin në mënyrë mekanike, Kleana Xhuveli nuk do të kishte fituar mandatin pa votat e Nismës Thurje.
Më tej, Shabani rrëfeu detaje nga formimi i koalicionit dhe zgjedhja e Adriatik Lapajt si kryetar, duke thënë: “Ramë dakord që Adriatiku të ishte kryetar, dhe nëse do të fitonim vetëm një mandat, ai u zotua publikisht se do të hiqte dorë. Kjo sepse qëllimi ynë ishte të punonim për ekipin dhe jo për karrierën personale të një individi.”
