Një shqiptar 33-vjeçar është arrestuar nga policia italiane në zonën e Castel de’ Britti, në Bolonja, pasi iu gjetën mbi 11 kilogramë kokainë e pastër dhe një armë zjarri e vjedhur. Ai akuzohet për trafik droge dhe mbajtje të armës pa leje.
Arrestimi u krye javën e kaluar, por autoritetet e bënë publik vetëm një ditë më parë. Policia kishte ndjekur lëvizjet e tij për disa javë dhe vendosi të kontrollonte banesën. Gjatë kontrollit, në bodrum u gjet një çantë me 10 pako kokaine me peshë totale mbi 11 kg.
Gjithashtu, në një furrë të integruar në kuzhinë, oficerët zbuluan një pistoletë të tipit ‘Arminius’, e kalibrit 38, e cila rezultoi e vjedhur në provincën e Sienës në nëntor 2022. Arma ishte e mbushur me një plumb, ndërsa 23 fishekë të tjerë ishin fshehur brenda furrës, në një çorape.
Shqiptari rezulton të ketë qenë më parë i dënuar me 14 vite burg për një vrasje të ndodhur në vitin 2011 në Bolonja. Ai ishte liruar në maj 2024, pasi kishte kaluar disa vite në paraburgim edhe për vepra të tjera penale, përfshirë shfrytëzimin e prostitucionit.
