Real Madrid përballet me një sezon shumë të veçantë. Jo vetëm për faktin se është i pari me Xabi Alonso në drejtim dhe i duhet medoemos të bëjë mirë, por edhe sepse ka disa çështje kontraktuale për të zgjidhur.
Më e rëndësishmja është ajo e Vinicius, i cili ka kontratën në përfundim në vitin 2027 dhe tashmë është momenti që palët të ulen në tavolinë e bisedimeve dhe të negociojnë për zgjatjen e saj pa hyrë në vitin e fundit, meqë dëshira nga të dy krahët është vazhdimi i bashkëpunimit.
Problem është rroga e brazilianit, i cili në rinovimin e fundit, në vitin 2022, kishte një pagë me rritje progresive në çdo vit, por që nuk arrin ato shifra që përfitojnë aktualisht Mbappe dhe Bellingham.
Në një klub ku lufta e egove bëhet edhe nëpërmjet rrogave, nëse braziliani do të kërkojë më shumë se 15 milionë euro neto në sezon, kjo do të përbënte problem për Realin pasi do të vinte në lëvizje edhe francezin e anglezin për të kërkuar rritje.
Sipas “AS”, tema do të trajtohet me kujdes nga klubi, që po mendon një zgjidhje nëpërmjet bonuseve të përshtatshme për objektiva të arritur, individualë dhe ekiporë. Reali shpreson të kënaqë Vinicius në këtë mënyrë, por edhe të shmangë një luftë rrogash me dy yjet e tjerë të ekipit dhe të turbullojë situatën te “los blancos”.
