Agjentët e Policisë së Shtetit në Milano, nën koordinimin e Prokurorisë së Monzës, kanë arrestuar një shtetas shqiptar 49-vjeç, i cili fshihte mbi gjashtë kilogramë kokainë dhe heroinë.
Hetimi nga Njësia Hetimore e Policisë së Milanos nisi pas një sinjalizimi anonim për lëvizje të dyshimta pranë një ndërtese në Cologno Monzese (Milano).
Policia kontrolloi 49-vjeçarin dhe i gjeti 30 gramë kokainë si dhe substanca për përzierjen e lëndëve narkotike. Ai kishte në posedim edhe çelësat e një apartamenti, i cili u bastis nga policia dhe brenda u zbulua një laborator për përgatitjen e drogës.
Gjatë operacionit u sekuestruan mbi katër kilogramë kokainë, dy kilogramë heroinë, 20 kilogramë substanca për përzierje, detergjentë dhe peshore precize. Droga ishte ndarë tashmë në qese dhe blloqe të gatshme për shitje.
Në banesën e të arrestuarit, që ndodhet në lagjen Lorenteggio të Milanos, policia sekuestroi mbi 50 mijë euro, të dyshuara si të ardhura nga trafiku i drogës.
