Sulmuesi suedez Viktor Gyokeres është vendosur nën masë disiplinore nga Sporting Lisbona, pasi nuk u paraqit në grumbullimin e ekipit, konfirmoi të shtunën presidenti i klubit, Frederico Varandas.
I pyetur për mungesën e sulmuesit, i cili kërkon largimin nga klubi, Varandas theksoi se Sporting është duke mbrojtur interesat e veta dhe shprehu besimin se situata do të zgjidhet.
“Jemi të qetë. Gjithçka do të zgjidhet me mbylljen e afatit kalimtar, një gjobë të rëndë dhe një kërkimfalje ndaj skuadrës”, u shpreh ai.
Gyokeres, golashënuesi më i mirë i kampionatit portugez në dy sezonet e fundit, ka qenë në qendër të vëmendjes për një transferim të mundshëm, me Arsenalin që ka treguar interes të përsëritur për të.
“Nëse ata nuk duan të paguajnë vlerën reale të tregut për Viktor Gyokeres, ne ndjehemi shumë rehat me atë situatë për tre vitet e ardhshme”, theksoi Varandas
