E ardhmja e Kristjan Asllanit vijon të mbetet një çështje e rëndësishme në shtëpinë e Interit. Zikaltërit kërkojnë që të shesin mesfushorin e kombëtares, pas 3 sezonesh bashkëpunimi, me nivelin e përformancën së futbollistit që ka qenë me ulje-ngritje.
Për të lënë të lirë Asllanin, Interi kërkon 18-20 milionë euro. Pista spanjolle e Betis nuk duket opsioni më i mirë i mundshëm për 23-vjeçarin, ndërsa brenda Italisë janë 2 klube që janë të gatshme të garojnë në distancë. Në Serie A, përveç Bolonjës, edhe Fiorentina mund të bëjë hapa konkret për të arritur te lojtari.
Sipas asaj që shkruajnë mediat italiane, tratativat janë komplekse për një arsye. Interi preferon shitjen e kartonit të Asllanit, ndërsa skuadrat e interesuara do ishin të kënaqura me huazim.
Kalimi i tij në njërën prej këtyre skuadrave do ishte mundësi e mirë për të treguar veten, madje do kishte më shumë hapësira sesa në Milano.
Vendimtare në fund do jetë vetë dëshira e Asllanit, me verën që pritet të jetë shumë e gjatë për futbollistin, kontrata e të cilit skadon në vitin 2028.
Në sezonin e fundit në Serie A, ai ka luajtur 22 ndeshje, ka realizuar 2 gola dhe ka dhuruar 2 asiste.
