Një ngjarje tragjike ndodhi më 11 korrik në fshatin Tervol të Gramshit, ku një 58-vjeçar humbi jetën si pasojë e rrëshkitjes së dheut gjatë punimeve për hapjen e një pusi.
Shtetasi H.D., 58 vjeç, ndodhej pranë një fadrome që po kryente punime në pronën e shtetasit S.D., kur një masiv dheu u shkëput papritur dhe ra mbi të, duke shkaktuar vdekjen e menjëhershme të tij.
Pas hetimeve, specialistët e Komisariatit të Policisë Gramsh arrestuan shtetasit S.B., 41 vjeç, dhe S.D., 53 vjeç. Ata akuzohen për “Shkelje të rregullave të mbrojtjes në punë” dhe “Ndërtim të paligjshëm”. Dyshohet se gjatë punimeve me fadromë, S.B. shkaktoi rrëshkitjen e masivit të dheut që përfundoi me vdekjen e shtetasit H.D.
“Specialistët për Hetimin e Krimeve të Komisariatit të Policisë Gramsh kanë kryer të gjitha veprimet procedurale për rastin.
Në përfundim u bë arrestimi i shtetasve S. B., 41 vjeç dhe S. D., 53 vjeç, për veprat penale “Shkelja e rregullave të mbrojtjes në punë” dhe “Ndërtimi i paligjshëm”, pasi shtetasi S. B., gjatë punës me fadromë, për hapjen e një pusi në pronën e shtetasit S. D., dyshohet se ka rrëshkitur një masiv dheu dhe ka rënë mbi shtetasin H. D., i cili për pasojë ka humbur jetën.“, njofton policia.
