Të paktën tre persona janë vrarë dhe një tjetër është arrestuar gjatë një operacioni ushtarak të forcave kolumbiane kundër kartelit më të madh të drogës në vend, Clan del Golfo. Sulmet ajrore ndodhën të enjten në një zonë malore të paarritshme të Antioquia-s, në veriperëndim të Kolumbisë.
Zyrtari Luis Eduardo Martinez konfirmoi për Blu Radio se katër të dyshuarit janë anëtarë të kartelit. Sipas tij, “bombardimet shkaktuan një rrëmujë të madhe”, ndërsa besohet se mund të ketë edhe viktima të tjera në radhët e grupit kriminal.
Ky ishte operacioni i katërt i tillë që nga fillimi i vitit dhe, sipas Ministrit të Mbrojtjes Pedro Sanchez, përmes këtyre sulmeve ajrore janë eliminuar rreth 30-40 anëtarë të Clan del Golfo.
Presidenti kolumbian Gustavo Petro, i cili u zgjodh në vitin 2022 me premtimin për një “paqe të plotë” përmes negociatave me grupet e armatosura, duket se po ndryshon qëndrim. Me dështimin e bisedimeve dhe presionin në rritje nga Shtetet e Bashkuara – sidomos pas rikthimit të Donald Trump në Shtëpinë e Bardhë – qeveria ka rifilluar ofensivën ushtarake.
Në muajt e fundit, marrëdhëniet mes dy vendeve janë tensionuar për shkak të çështjeve si deportimet e emigrantëve, tarifat dhe një komplot i dyshuar për rrëzimin e Petros, ku pretendohet për përfshirje të politikanëve republikanë amerikanë.
