Tensionohet situata në zonën e Thethit ku Inspektorati Kombëtar i Mbrojtjes së Territorit (IKMT), pas urdhrit të kryeministrit Edi Rama, po vijon aksionin për shembjen e ndërtimeve pa leje.
Por ditën e sotme është shënuar një incident i rëndë ku disa persona të paidentifikuar kanë qëlluar me molotov fadromat e IKMT‑së.
Kreu i IKMT-së, Fatmir Metaj shihet mbi një fadromë, teksa thërret në drejtim të personit që ka hedhur molotovin: “Ku je o trim”, madje më pas vijon duke ofenduar banorët e Thethit me fjalor prej rrugaçi: “Dil o të q*** ropt“.
Menjëherë pas këtij incidenti, drejt Thethit janë nisur me urgjencë tre furgonë me efektivë të Repartit të Forcave të Ndërhyrjes së Shpejtë.
Grupi hetimor vijon veprimet për identifikimin dhe kapjen e personit që hodhi në rrugë lëndën djegëse, ndërsa Shërbimet e Policisë Shkodër dhe ato të Forcës Kombëtare të Sigurisë ndodhen në zonë, në mbështetje të strukturave të IKMT Tiranë dhe IMT të Bashkisë Shkodër.
- Kush është Fatmir Metaj?
Operacioni i trupave të Inspektoriatit Kombëtar të Mbrojtjes së Territorit në zonën e Thehtit drejtohet nga Fatmir Metaj, një zyrtar i lartë i shtetit i cili ka disa “precedentë” me drejtësinë për shkak të prishjeve të ndërtimeve pa leje, më herët, në Tiranë dhe zona të tjera të vendit.
Karrierën ai e ka nisur si shef i Komisariatit të Tropojës, në vitin 1998, dhe makina e tij është përdorur nga autorët e vrasjes së Azem Hajdarit.
Referuar një vendimi të firmosur nga gjyqtari Sokol Pasho, që mban datën 14 dhjetor 2018, Metaj inspektor në Inspektoratit Kombëtar të Mbrojtjes së Territorit, u dënua me 1 vit burgim si dhe iu hoq e drejta për të ushtruar funksione publike për 3 vite.
Fatmir Metaj u dënua për prishjen e 4 objekteve, një prej tyre me leje ndërtimi dhe tre objekte në proces legalizimi në Tiranë dhe Vaqarr. Objektet e prishura në kundërshtim me ligjin janë realizuar përgjatë viteve 2013-2014 dhe kanë qenë të ndërtuara në rrugën “Mihal Grameno” dhe përgjatë rrugës së Vaqarrit.
Lexo edhe:
“Plas” molotovi në Theth, policia i drejton kallashnikovin banorëve/ REAGIMI – VIDEO
