Prodhuesi amerikan i çipave, Nvidia, është kompania e parë në botë që arrin një vlerë tregu prej 4 trilion dollarësh.
CNN shkruan se aksionet e kompanisë u rritën me deri në 2.4% duke shkuar në 164 dollarë të mërkurën e 9 korrikut, ndërsa kompania vazhdon të përfitojë nga rritja e vazhdueshme e kërkesës për teknologjinë që fuqizon inteligjencën artificiale.
Kompania me seli në SHBA arriti një vlerë tregu prej 1 trilion dollarësh për herë të parë në qershor të vitit 2023 dhe ka vazhduar të rritet me shpejtësi që atëherë.
“Ky është një moment historik për Nvidia-n”, tha analisti i teknologjisë Dan Ives i Wedbush Securities, që është një firmë private e shërbimeve financiare me bazë në Los Anxhelos.
“Ata janë të vetmit në treg me çipet e tyre, që janë bërë si ari dhe nafta e re,” shtoi analisti.
Çmimi i aksioneve të Nvidia-s ra ndjeshëm në prill kur tregjet globale u tronditën nga lufta e intensifikuar e tarifave e Presidentit të SHBA-ve, Donald Trump.
Megjithëse shqetësimet për politikat tregtare të Trump-it nuk janë zhdukur, çmimi i aksioneve të Nvidia-s është rritur fuqishëm që nga pranvera e këtij viti për të arritur këtë pikë të re.
