Një aksion kërkimi i ushtrisë turke në Irakun verior është kthyer në tragjedi, pasi 12 ushtarë kanë humbur jetën nga helmimi me gaz metani. Ngjarja ndodhi në zonën e njohur si “Operacioni Claw-Lock”, ku prej tre vitesh po kërkohej trupi i një ushtari të vrarë nga luftëtarët kurdë të PKK-së.
Fillimisht, Ministria turke e Mbrojtjes konfirmoi vdekjen e tetë ushtarëve, por më vonë numri u përditësua në 12. “Katër shokë të tjerë heroikë të armëve, të prekur nga gazi metan, kanë ndërruar jetë, duke e çuar numrin e viktimave në 12”, thuhej në një deklaratë zyrtare në platformën X.
Metani është një gaz pa ngjyrë dhe pa erë, por i rrezikshëm për jetën në përqendrime të larta, pasi mund të shkaktojë asfiksi. Sipas autoriteteve, gjatë kërkimit në një shpellë që dikur ishte përdorur nga PKK-ja si spital fushor, gjithsej 19 ushtarë u ekspozuan ndaj gazit vdekjeprurës.
Pjesa tjetër e ushtarëve të helmuar janë transportuar në spital për trajtim, ndërsa autoritetet ushtarake kanë nisur hetime për zbardhjen e plotë të rrethanave.
Shpella ndodhet në një zonë malore në lartësinë 852 metra, në afërsi të kufirit me Turqinë. Operacioni ishte pjesë e ofensivës që Ankaraja nisi në prill të vitit 2022 kundër militantëve të Partisë së Punëtorëve të Kurdistanit (PKK), e cila konsiderohet organizatë terroriste nga Turqia, SHBA dhe BE.
Ushtari që po kërkohej ishte vrarë tre vite më parë nga “të shtënat terroriste”, sipas ministrisë turke. Ekipet e kërkimit kanë qenë të angazhuara në zonë që prej atëherë.
Turqia dhe PKK-ja janë përfshirë në një konflikt të gjatë prej mbi 40 vitesh, që ka shkaktuar rreth 40,000 viktima. Kohët e fundit, është raportuar se Ankaraja është në bisedime me përfaqësues të PKK-së për t’i dhënë fund luftës së armatosur, pas një deklarate të grupit për ndalimin e operacioneve ushtarake.
