Presidenti i ri i Iranit, Masoud Pezeshkian, ka deklaruar në një intervistë për gazetarin amerikan Tucker Carlson se është bërë objektiv i një tentative për atentat nga Izraeli.
“Po, ata u përpoqën. Ata vepruan në përputhje me rrethanat, por dështuan,” tha Pezeshkian, duke treguar se gjatë një takimi ku ndodhej, Izraeli kishte tentuar të bombardonte zonën, por pa sukses.
Kreu i shtetit iranian shtoi se nuk beson që Shtetet e Bashkuara qëndrojnë pas këtij sulmi, duke i atribuar përgjegjësinë ekskluzivisht Izraelit.
Megjithatë, pavarësisht tensioneve të larta dhe bombardimeve të objekteve bërthamore iraniane gjatë përshkallëzimit të fundit të konfliktit me Izraelin, Pezeshkian deklaroi se Irani nuk ka problem të rifillojë bisedimet me SHBA-në.
Deklarata vjen në një moment kur rajoni mbetet i tensionuar, dhe çdo zhvillim diplomatik mes Teheranit dhe Uashingtonit shihet me interes nga aktorët ndërkombëtarë.
