Shumë njerëz preferojnë të mbajnë telefonin pranë shtratit gjatë natës, për të dërguar një mesazh si “Natën e mirë”, për të dëgjuar muzikë relaksuese apo për të vendosur alarmin e mëngjesit.
Por, ekspertët paralajmërojnë se ky zakon i përhapur gjerësisht mund të jetë i rrezikshëm dhe duhet ndërprerë menjëherë.
Sakaq vetë kompania Apple ka lëshuar një paralajmërim për përdoruesit që karikojnë telefonin e tyre nën jastëk, pasi kjo mund të çojë në mbinxehje dhe të kthehet në një rrezik të mundshëm për zjarr. Paralajmërimi vjen në një kohë ku të gjitha vendet po përballen me valën e të nxehtit dhe temperatura ekstreme.
Apple gjithashtu ka ngritur shqetësime lidhur me pluhurin dhe papastërtitë që mund të grumbullohen në portën e karikimit, duke e rritur më tej rrezikun për zjarr.
“Mos flini mbi pajisjen, karikuesin dhe mos i vendosni pajisjet nën batanije, jastëk apo nën trupin tuaj, kur janë duke u karikuar”, ka paralajmëruar Apple.
Gjiganti teknologjik thekson se mosrespektimi i këtyre udhëzimeve të sigurisë mund të çojë në zjarr, goditje elektrike, lëndime apo dëmtime të iPhone, ose edhe pajisjeve të tjera.
Edhe kompania britanike Firechief Global, e specializuar në zgjidhje për sigurinë nga zjarri, ka lëshuar një paralajmërim të ngjashëm: karikimi i telefonit nën jastëk apo batanije përbën rrezik serioz për zjarr.
“Telefonat gjenerojnë nxehtësi gjatë karikimit dhe, nëse mbulohen me jastëk ose batanije, kjo nxehtësi mund të shtohet, duke rritur rrezikun e mbinxehjes dhe mundësinë për shpërthim zjarri,” tha drejtori menaxhues i kompanisë, Laurie Pollard.
Ai shtoi se mbikarikimi, pra lënia e telefonit në karikim gjatë gjithë natës është një nga shkaqet kryesore të zjarreve që lidhen me bateritë litium-jon.
Pollard këshillon që telefonat të mos karikohen mbi komodina pranë shtratit, sidomos nëse janë prej materiali të djegshëm. Në vend të kësaj, ai rekomandon që pajisjet të karikohen mbi sipërfaqe të sheshta dhe të hapura, larg materialeve që mund të marrin flakë shpejt.
Megjithëse shumica e telefonave modernë janë të pajisur me sisteme mbrojtëse ndaj mbikarikimit, rreziku mbetet në rast se këto sisteme dështojnë.
