Klubet nga Shqipëria, vazhdojnë përgatitjet për ndeshjet Europiane, ku do të marrin pjesë.
Në miqësoret e zhvilluara këtë të martë të 1 korrikut, skuadrat e Superiores zhgënjyen totalisht. Vllaznia u mposht me rezultatin e thellë 4-0 nga sllovenët e Olimpija Ljubljana.
Ekipi shkodran u dominua të gjithë takimin, ndërsa vendasit shënuan dy herë në çdo pjesë, për të marrë fitoren.
Vlen të përmendet se për shumicën e pjesës së dytë, Vllaznia luajti me 10 lojtarë, pasi Artan Jazxhi u ndëshkua me karton të kuq, për një ndërhyrje të ashpër në mesfushë.
Për skuadrën kuqeblu kjo ishte miqësorja e tretë në Slloveni, ku më herët u mposht 5-3 nga Koper, ndërsa fitoi 1-0 ndaj rumunëve të UTA Arad.
Humbje regjistroi edhe Dinamo. Kryeqytetasit u mposhtën me rezultatin 2-1 nga Shkëndija, në ndeshjen e zhvilluar në Tetovë.
Pjesa e parë u mbyll në barazim 1-1, pas golave të Krasniqit për kuqezinjtë dhe Itodo Mandela te blutë.
Në fraksionin e dytë, Jakupi shënoi golin që i dha fitore Shkëndijës, me tetovarët që më herët shpërdoruan edhe një penallti.
