Një ngjarje tronditëse është regjistruar në Lima, kryeqyteti i Perusë, ku punonjës të një impianti të trajtimit të ujërave në zonën “La Atarjea” kanë zbuluar trupin e pajetë të një vajze të futur në qese plastike.
Viktima është identifikuar si Fabiola Alejandra Caicedo Pina, 19 vjeçe, një e re e njohur në rrjetin social TikTok, e cila ishte shpallur e zhdukur prej disa ditësh. Identifikimi i saj u bë i mundur përmes tatuazheve karakteristike në trup.
Autoritetet janë ende duke hetuar shkaqet e vdekjes, por kanë përqendruar hetimet në dy pista kryesore. Njëra ka të bëjë me dyshime për përfshirjen e saj në rrjete të paligjshme që veprojnë në zonë, pasi në javët e fundit janë raportuar disa raste të ngjashme me vajza të reja të gjetura të pajeta në Lima dhe afër lumit Rimac.
Pista tjetër lidhet me vdekjen e ish-partnerit të saj, Mayner Yoffrey Giménez Castrillo, i cili ndërroi jetë në vitin 2022 në rrethana të paqarta. Edhe pse fillimisht u dyshua për dhunë, më vonë u hodhën dyshime për vetëlëndim.
Sipas hetimeve paraprake, dyshohet se vajza është marrë me forcë nga një ambient festiv pak orë para vdekjes. Gjurmët në trup tregojnë për një trajtim të dhunshëm, ndërsa mendohet se trupi i saj është hedhur në lumin Rimac dhe më pas ka përfunduar pranë impiantit ku u zbulua.
Policia ka nisur analizimin e kamerave të sigurisë dhe po merr në pyetje persona që kanë pasur kontakte të fundit me të renë. Deri tani nuk ka persona të ndaluar apo të shpallur si të dyshuar.
