Flamurtari i Vlorës ka bërë zyrtare emërimin e Carlos García si trajner i ri i skuadrës, duke nisur kështu një kapitull të ri në pankinën kuqezi.
Spanjolli vjen me një përvojë të pasur si ndihmëstrajner, pasi ka qenë pjesë e stafit teknik të Chicago Fire në MLS dhe më herët edhe tek Udinese në Itali.
Në karrierën e tij si futbollist, García ka mbrojtur ngjyrat e disa klubeve të njohura si: RCD Espanyol, UD Almería, Real Betis, Maccabi Tel Aviv në Izrael dhe Alanyaspor në Turqi.
Klubi vlonjat ka bërë publike gjithashtu dy rinovime të rëndësishme: Ariol Kaloshi ka firmosur zyrtarisht kontratën e re dhe do të vazhdojë të jetë pjesë e skuadrës, ashtu si edhe Lorenc Trashi, një tjetër emër i rëndësishëm që do të kontribuojë në vazhdimësinë dhe stabilitetin e ekipit.
Flamurtari synon të ndërtojë një ekip konkurrues dhe emërimet e fundit janë dëshmi e qartë e kësaj ambicie.
