Prokurorja e Sarandës, Esmeralda Basho, është përfshirë në një seri denoncimesh të transmetuara disa herë nga emisioni “Stop” në Tv Klan, për keqmenaxhim dhe manipulim të hetimeve. Ajo nuk ka siguruar pamjet filmike në raste të ndryshme, përfshirë një konflikt mes adoleshentësh dhe një incident në një lokal, ku videot dhe një telefon janë zhdukur.
Rasti më i rëndësishëm është ai i qershorit 2022, kur në banesën e ndërtuesit Lefter Lefteri u vendos tritol. Hetimin për këtë ngjarje e mori në dorë prokurorja Basho, ndërsa agjenti Mariglen Basho djali i xhaxhait të saj kishte detyrën të merrte pamjet filmike nga vendi i ngjarjes. Megjithatë, pamjet nuk u siguruan, dhe pasi u publikuan në rrjetet sociale, prokurorja nisi hetimin ndaj shefit të komisariatit për shpërdorim detyre dhe kërkoi pezullimin e tij.
Prokurori i Rrethit Sarandë e hoqi Esmeraldën Basho nga hetimi për shkak të konfliktit të interesit, por ajo e ankimoi këtë vendim në Këshillin e Lartë të Prokurorisë, ankim që u rrëzua.
Ndërkohë, ndaj prokurores është nisur një hetim penal nga Prokuroria e Sarandës për “shpërdorim detyre” dhe “zhdukje të dokumenteve”, pasi dyshohet se ka fshehur disa akte në një dosje që lidhet me zhdukjen e pamjeve filmike dhe një telefoni.
Avokati Arben Llangozi shprehet se në disa ngjarje të njëpasnjëshme, prokurorja Basho dhe djali i xhaxhait të saj nuk kanë marrë pamjet filmike dhe kanë ndikuar në ndryshimin e rrjedhës së hetimeve, siç është denoncuar edhe në emisionin “Stop”./tvklan.al
