Në moshën 74-vjeçare, Skënder Cena nga Kukësi, por prej vitesh me banim në Kamëz, është maturanti më i moshuar në Shqipëri. Një histori që dëshmon se nuk është kurrë vonë për të ndjekur ëndrrat.
Në vitin 1973, një shpërthim në Hidrocentralin e Fierzës ku punonte i mori pjesërisht shikimin dhe i pamundësoi vazhdimin e shkollës së mesme. Megjithatë, pas më shumë se 40 vitesh, në moshën 64-vjeçare, ai vendosi të rikthehej në bankat e shkollës në Kamëz dhe të përfundonte arsimin e mesëm.
Pas shumë vështirësive, por me një entuziazëm dhe vendosmëri të jashtëzakonshme, Skënder Cena arriti të përmbushë këtë synim të gjatë jetësor, duke dhënë me sukses edhe provimin e fundit, atë të anglishtes, këtë vit.
Në një rrëfim për emisionin “Tak Fak”, ai ndau me publikun momentet e shkollës, sfidat që kaloi dhe forcën e besimit që e mbajti gjallë gjatë gjithë rrugëtimit. Pas diplomimit, Skënderi ka plan të vazhdojë edhe studimet e larta.
“Jam i lumtur, isha 56 vjeç kur fillova gjimnazin. Ditën e parë që u ula në klasë isha shumë i lumtur, nxënësit e tjerë më kujtuan për profesor dhe më pyesnin se çfarë lënde do t’ju jepja. Pastaj kur iu bashkova atyre si nxënës, krijuan një respekt për mua. Të gjithë mësuesit më kanë ndihmuar njëlloj, pa përjashtim. Mësuesi është më i shenjti në këtë botë pas Zotit dhe prindit.
Shkollën 7 vjeçare në atë kohë e kam bërë në Kalis të Kukësit. Kam qenë shumë mirë me mësime. Pasi mbarova 7-vjeçaren, nuk arrita të futesha në gjimnaz se kisha biografi të keqe. Pastaj e rinisa shumë vite më pas, nuk ishte e lehtë. Më shoqëronte vajza, herë djali apo vajza e vëllait. I falënderoj mësuesit e mi.
Tani kam dëshirë të filloj universitetin, por kam një problem, sepse më duhet një njeri pas vetes, një makinë për të çuar dhe sjellë në shtëpi. Dëshira është shumë e madhe ta kisha mbaruar edhe universitetin, pavarësisht moshës. Do të isha shumë mirënjohës nëse dikush do më ndihmonte në këtë rrugëtim tjetër të jetës sime” u shpreh Skënder Cena në intervistën dhënë për Tak-Fak.
