Milan po punon për të ndërtuar një mesfushë më të re dhe dinamike për të ardhmen, dhe një nga emrat që ka ngjallur interes të veçantë në radhët e klubit është Ardon Jashari, mesfushor 22-vjeçar me origjinë shqiptare dhe pasaportë zvicerane, që aktivizohet te Club Brugge.
Jashari, i cili u transferua nga Lucerna në verën e vitit 2024 për 7 milionë euro plus bonuse, ka shpërthyer që në sezonin e parë në kampionatin belg, duke u shpallur si lojtari më i mirë i sezonit dhe njëkohësisht talenti më premtues.
Gazetari i njohur belg, Sacha Tavolieri, ekspert i merkatos dhe i futbollit belg, ka dhënë një vlerësim shumë pozitiv për Jasharin:
“Jashari është një mesfushor shumë i fortë. Mund ta zëvendësojë direkt Reijndersin në mesin e fushës. Madje është më i kompletuar se Reijnders kur ky i fundit mbërriti te Milani nga AZ. Ka një aftësi të madhe në parashikimin dhe ndërprerjen e aksioneve, menaxhon mirë topin dhe e kupton saktë kur duhet të shtyjë përpara, duke u kthyer pothuajse në një numër 10 kur skuadra sulmon.”
Tavolieri shton gjithashtu se Jashari është gati menjëherë për formacionin titullar, pasi është i përgatitur psikologjikisht dhe teknikisht, dhe lexon lojën më shpejt se shumica e lojtarëve në pozicionin e tij.
Megjithatë, negociatat nuk do të jenë të lehta. Club Brugge kërkon mbi 30 milionë euro për kartonin e tij, një çmim i lartë, por jo i pazakontë për klubin belg, i njohur për qëndrimet e forta në negociata (mjafton të kujtojmë rastin De Ketelaere).
Në fund, Tavolieri përfundon:
“Jashari është shumë i interesuar të shkojë te Milani dhe po punon me klubin për ta realizuar këtë transferim. Ai e adhuron idenë e veshjes së fanellës kuqezi dhe jam i bindur se do të shkëlqente në Milano.”
Një tjetër emër shqiptar në horizontin e madh të futbollit europian dhe ndoshta, së shpejti, edhe në zemër të “San Siros”.
