Ambasadori i Izraelit në Kombet e Bashkuara, Danny Danon, ka deklaruar se mundësia për zhvillimin e bisedimeve diplomatike me Iranin është reale dhe mund të ndodhë së shpejti. Në një prononcim për mediat në selinë e OKB-së në Nju Jork, Danon theksoi se edhe pse është ende herët për të bërë vlerësime të plota për sulmet izraelite ndaj objekteve bërthamore iraniane, objektivi kryesor është arritur.
“E dimë që arritëm ta shtyjmë programin. Arritëm të eliminojmë kërcënimin e afërt që kishim,” tha ai.
Në të njëjtën kohë, Danon u shpreh se është koha për të ndërtuar ura dhe partneritete në rajon, duke lënë të kuptohet se Izraeli është i hapur për normalizimin e marrëdhënieve me vende të tjera arabe, njësoj siç ka ndodhur me Emiratet e Bashkuara Arabe, Bahreinin dhe Marokun përmes Marrëveshjeve të Abrahamit.
