Kombet e Bashkuara kanë reaguar me shqetësim të thellë pas sulmeve të ndërmarra nga Shtetet e Bashkuara mbi objektet bërthamore iraniane, duke paralajmëruar për pasoja të rënda në nivel global.
Sekretari i Përgjithshëm i OKB-së, Antonio Guterres, deklaroi se është thellësisht i alarmuar nga përdorimi i forcës ndaj Iranit, duke e cilësuar veprimin si një përshkallëzim të rrezikshëm në një rajon të brishtë.
“Ky është një përshkallëzim i rrezikshëm në një rajon që tashmë është në buzë të trazirave dhe një kërcënim i drejtpërdrejtë për paqen dhe sigurinë ndërkombëtare,” shkroi Guterres në platformën X (ish-Twitter).
I am gravely alarmed by the use of force by the United States against Iran today. This is a dangerous escalation in a region already on the edge – and a direct threat to international peace and security.
There is a growing risk that this conflict could rapidly get out of…
— António Guterres (@antonioguterres) June 22, 2025
Ai paralajmëroi se ekziston një rrezik në rritje që ky konflikt të dalë jashtë kontrollit, duke sjellë pasoja katastrofike për civilët, rajonin dhe botën.
Në këtë kuadër, Guterres u bëri thirrje shteteve anëtare të OKB-së që të ndërmarrin hapa urgjentë për uljen e tensioneve dhe për të shmangur një përplasje të gjerë me pasoja të paparashikueshme.
Më 21 qershor 2025, Shtetet e Bashkuara ndërmorën një sulm të befasishëm ajror ndaj tre objekteve bërthamore iraniane Fordo, Natanz dhe Esfahan në bashkëpunim me Izraelin.
Presidenti Donald Trump e quajti këtë një “sukses spektakolar ushtarak”, ndërsa Kryeministri izraelit Netanyahu tha se ky është një moment që “do të ndryshojë historinë”. Reagimet ndërkombëtare janë të përziera, me paralajmërime për pasoja të rënda dhe përshkallëzim të mëtejshëm të konfliktit në Lindjen e Mesme.
