Rruga në lagjen Evrenezas të Ersekës, 700 metra larg qendrës së qytetit ndodhet në një gjendje të mjerueshme dhe copë-copë.
Banorët e zonës shprehin indinjatën për mungesën e infrastrukturës. Siç shihet edhe nga pamjet e dërguara në redaksi, rruga vetëm rrugë që nuk mund të quhet, kjo për shkak të mungesës së një asfalti, gropave të shumta dhe papastërtisë së përhapur.
Në këtë rrugë të degraduar, përgjegjësia bie mbi banorët e papërgjegjshëm që e kanë qelbur zonën me mbeturinat që hedhin në tokë, por jo vetëm dhe institucionet kryesore, si bashkia e Kolonjës e cila nuk e ka vënë ujin në zjarr për të ndërhyrë të pastrojë zonën në fjalë.
“Kjo rruge, i thënçin rruge, ndodhet ne lagjen Evrenezas 700 m ne vije ajrore nga qendra e Ersekes. Ne fakt fajtore, jane ata banore te pa pergjegjshem qe i derdhin por edhe bashkia qe s’ben punen qe paguhet. Imagjinoni per kete rruge paguhet dhe ndriçim”, shkruan qytetari në denoncimin për JOQ.
Ndonëse taksat shkojnë çdo ditë në duart e bashkisë, kjo e fundit nuk ofron asnjë shërbim konkret për rastin në fjalë, një rrugë për banorët dhe pastërti. Sikur të mos mjaftonin këto probleme, banorët paguajnë ndriçimin publik, por rruga është çdo natë në errësirë dhe pa asnjë kusht minimal.
Banorët që jetojnë në këtë lagje kërkojnë shërbimet bazë, kërkojnë një rrugë, pastërti dhe që të justifikohen taksat që japin, pasi Evreneza është jo shumë larg qytetit ndaj kërkohet që bashkia Kolonjë me në krye Erion Isai të veprojë menjëherë.
