Pas një periudhe të vështirë dhe një beteje për mbijetesë në Superiore, Tirana dhe trajneri Bledi Shkëmbi kanë vendosur të ndajnë rrugët me marrëveshje të përbashkët, njofton klubi bardheblu në rrjetet sociale.
Edhe pse kontrata e tij ishte e vlefshme deri në dhjetor, drejtuesit dhe trajneri kanë “ndarë rrugët”.
Në mandatin e tij të dytë me bardheblutë, Shkëmbi drejtoi ekipin në 15 ndeshje, duke regjistruar një mesatare prej 1.60 pikësh për ndeshje, por kjo nuk ishte e mjaftueshme për të siguruar qëndrueshmëri.
Tirana tashmë ka nisur kërkimin për një trajner të ri që do të marrë përgjegjësinë për ndërtimin e ekipit për sezonin e ardhshëm, me synimin për t’u rikthyer në garën për titull.
Njoftimi i Tiranës:
“Klubi i Futbollit Tirana njofton përfundimin e bashkëpunimit me trajnerin Bledi Shkëmbi.
Pas një marrëveshjeje të ndërsjellë, palët kanë vendosur të mbyllin bashkëpunimin profesional.
KF Tirana shpreh mirënjohjen e saj për kontributin, përkushtimin dhe profesionalizmin e treguar nga z. Shkëmbi gjatë periudhës në drejtimin e skuadrës, dhe i uron atij suksese të mëtejshme në karrierën e tij”, shkruhet në njoftimin në rrjetet sociale të Tiranës që mbylli kështu këtë etapë të Shkëmbit në klubin kryeqytetas.
