Një aeroplan “Airbus” i kompanisë ajrore private rumune “Carpatair”, i cili po operonte në linjën Athinë-Riga, bëri një ulje emergjente këtë mëngjes në aeroportin ndërkombëtar të kryeqytetit grek, “Elefterios Venizelos”.
Sipas mediave helene, avioni u rikthye pak minuta pasi u nis nga aeroporti i Athinës, pasi në kabinën e pilotit u shfaq tym. Sipas informacioneve, në avion ndodheshin 150 pasagjerë në bord, kur ndodhi incidenti.
Piloti u detyrua ta kthente aeroplanin në aeroportin e Athinës menjëherë pas ngritjes, sipas të dhënave nga Flightradar24. Siç raportohet, asnjë nga pasagjerët nuk është lënduar në këtë incident. Ata janë të gjithë në gjendje të mirë shëndetësore.
Ndërkohë, teknikët do ta inspektojnë avionin në aeroportin e Athinës.
