Klubi i Teutës është zyrtarisht pa president, pas largimit nga ky post i presidentit Edmond Hasanbelli. Por që nga sot, është zyrtarisht edhe pa stadium, pasi me Vendim të Këshillit të Ministrave, ka ndryshuar pronësia e stadiumit durrsak.
VKM e publikuar në Fletoren zyrtare tregon “Transferimin në pronësi të shoqërisë aksionare “Korporata e Investimeve Shqiptare”, sh.a., me NIPT: M01917011D, të pronave shtetërore sipas shtojcës nr.1, që i bashkëlidhet këtij vendimi, për realizimin e projektit të investimit “Rijetëzimi i stadiumit “Niko Dovana”, Durrës”.
Vendimi në fjalë, zyrtarizon kështu këtë ent shtetëror që të nisë efektivisht procedurat për të vënë në zbatim projektin për rindërtimin e stadiumit të qytetit të Durrësit dhe zonës përreth tij sipas projektit të miratuar pak kohë më parë.
Por kjo do të thotë që klubi i Teutës duhet të shpërngulet tashmë nga impianti dhe të nisë shtegtimin në të tjerë për këtë edicion në Superiore, duke zhytur edhe me shumë në kaos durrsakët në një vit tranzicioni që duket se vë në dyshim edhe mbijetesën e tyre në elitë.
