Los Angeles Lakers do të ndryshojë pronësi. Familja Buss ka arritur marrëveshjen për të shitur maxhorancën e aksioneve, duke shënjuar fundin e epokës së një prej pronësive më të famshme në NBA-në amerikane.
Sipas raportimeve nga ESPN, aksioneri kryesor i skuadrës së basketbollit do të bëhet Mark Walter, i cili është administrator dhe president i kompanisë TWG Global. Ai ka arritur marrëveshjen për të blerë aksionet e Lakers për 10 miliardë dollarë, duke regjistruar operacionin më të kushtueshëm në histori për shitjen e një klubi sportiv.
Pronari i ri është një figurë e njohur në Kaliforni, pasi zotëron edhe aksione te skuadra e bejzbollit Los Angeles Dodgers, si edhe në ekipin e basketbollit të femrave, Los Angeles Sparks.
Prej vitit 1979, kur Jerry Buss bleu Lakers, ai i shndërroi në një prej ekipeve profesioniste më të famshme, duke fituar edhe pesë tituj kampionë në NBA.
Pas ndarjes së tij nga jeta në vitin 2013, drejtimin e mori e bija, Jeanie Buss, e cila u shndërrua në një prej femrave më të fuqishme në sportin botëror.
Edhe pse Los Angeles Lakers nuk ka dhënë komente për ndryshimin e pronësisë, ESPN thekson se Jeanie Buss do të qëndrojë në krye të skuadrës edhe pas shitjes.
