Janë zbardhur detaje të reja nga arrestimi i 50-vjeçarit Zamir Halili, i cili u vu në pranga nga forcat Operacionale të Policisë së Shtetit më 11 Qershor në Elbasan.
Ai rezulton i dënuar me 7 vjet burgim në Itali për krime kundër personit dhe krime seksuale. Mediat italiane raportojnë se Zamir Halili ishte shpallur në kërkim që prej vitit 2016 nga Gjykata e Sienës, teksa akuzohet për përdhunimin dhe dhunimin e ish-bashkëshortes së tij.
Dyshohet se aktet e rënda Zamir Halili i ka kryer rreth dy dekada më parë, gjatë periudhës 2005-2010, kohë kur banonte në Monteriggioni, provincë e Sienës.
Fillimisht 50-vjeçari nga Elbasani ishte arrestua nga karabinierët e stacionit Monteriggioni dhe më pas ishte dëbua nga territori italian në zbatim të një dispozite të lëshuar në vitin 2012 nga Prefektura e Sienës me propozimin e Shtabit të Policisë lokale. Tashmë atij i kanë ngelur edhe 6 vjet, 8 muaj e 27 ditë burg.
“Gjykata e Sienas, Itali, në vitin 2014, e ka dënuar me 7 vjet burgim, për plagosje, dhunë në familje dhe marrëdhënie seksuale me dhunë. Nga ky dënim atij i kanë mbetur për të vuajtur rreth 6 vjet e 9 muaj burgim.” – thuhet në njoftimin e autoriteteve.
Policia deklaroi se Interpol Tirana po bashkëpunon me Interpol Romën për të finalizuar procedurën e ekstradimit të 50-vjeçarit, në Itali.
