Irani ka paralajmëruar Uashingtonin se do t’i përgjigjet fort Shteteve të Bashkuara nëse ato përfshihen drejtpërdrejt në fushatën ushtarake të Izraelit. Ambasadori iranian në Kombet e Bashkuara në Gjenevë, Ali Bahreini u tha gazetarëve se ai e sheh SHBA-në si bashkëpunëtore në atë që po bën Izraeli.
“Ne do t’u japim Shteteve të Bashkuara të njëjtën përgjigje që i japim Izraelit. Jam i bindur se [ushtria e Iranit] do të reagojë fuqishëm, në mënyrë proporcionale dhe të përshtatshme. Ne po ndjekim nga afër nivelin e përfshirjes së SHBA-së… Do të reagojmë sa herë që të jetë e nevojshme,” tha ai.
SHBA-të deri më tani kanë ndërmarrë vetëm veprime indirekte në konfliktin aktual midis Izraelit dhe Iranit, duke përfshirë ndihmën në rrëzimin e raketave të lëshuara drejt Izraelit. Presidenti i SHBA-së Donald Trump thuhet se po shqyrton mundësinë e marrjes së një roli të drejtpërdrejtë në sulmet e Izraelit ndaj objekteve bërthamore dhe ushtarake të Iranit.
