Izraeli dhe Irani kanë kryer sërish sulme gjatë natës ndaj njëri-tjetrit. Shpërthime u raportuan në disa zona të Teheranit.
Forcat Mbrojtëse të Izraelit (IDF) njoftuan se kryen një sulm ajror kundër objektivave ushtarake dhe raketore iraniane në Iran, duke përdorur mbi 50 avionë luftarakë për të goditur objekte të dyshuara për prodhim centrifuge për pasurimin e uraniumit dhe impiante prodhimi armësh.
Në një deklaratë, IDF theksoi se operacioni u bazua në “inteligjencë të saktë” dhe është pjesë e një përpjekjeje për të neutralizuar programin bërthamor të Iranit. U shënjestruan gjithashtu fabrikat që prodhojnë komponentë dhe lëndë të para për raketa balistike, arma kryesore sulmuese iraniane në konfliktin e vazhdueshëm me Izraelin.
Ndërkohë, raketa u lëshuan edhe nga Irani drejt Izraelit në një valë të dytë në më pak se një orë, konfirmoi ushtria izraelite, duke shtuar se disa prej tyre u interceptuan. Korpusi i Gardës Revolucionare Islamike (IRGC) e Iranit deklaroi se në sulmin e fundit ndaj territorit izraelit përdorën raketa hipersonike Fattah-1.
Fattah është raketa e parë hipersonike e zhvilluar nga Irani, e cila u zbulua në vitin 2023. Në atë kohë, kreu i programit hapësinor të IRGC-së, Amir Ali Hajizadeh , e quajti atë “një kërcim brezash” për teknologjinë iraniane të raketave, e aftë të manovrojë si brenda ashtu edhe jashtë atmosferës së Tokës dhe të shmangë çdo sistem mbrojtës.
Lideri suprem i Iranit Ali Khamenei iu përgjigj kërcënimeve të Donald Trump, i cili i kërkoi Teheranit të pranonte “një dorëzim pa kushte”. Ai u zotua se nuk do të tregojë mëshirë ndaj Izraelit. “Beteja fillon.”, ka thënë ai.
