Vllaznia ka luajtur sot miqësoren e parë të vërtetë si pjesë të përgatitjeve për pjesëmarrjen në Ligën e Konferencës. Dhe kundërshtari ka qenë po një skuadër e cila merr pjesë në të njëjtin turne, Deçiçi i Tuzit.
Në ndeshjen e zhvilluar pikërisht në Tuz, shkodranët janë mundur me shifrat 1-0, edhe pse kanë krijuar një lojë më të mirë, teksa kanë kërkuar me ngulm golin e avantazhit, duke shpërdoruar raste të mira sidomos në pjesën e parë ku u aktivizuan lojtarët titullarë.
Në të dytën, Martini bëri zëvendësime duke aktivizuar lojtarët e stolit dhe të rinjtë që i janë bashkuar ekipit të parë për këtë sezon.
Por në momentin më të mirë të shkodranëve, erdhi goli i Deçiçit, që rezistoi deri në fund të sfidës, për të shënuar kësisoj suksesin minimal të skuadrës vendase.
